شارپرێس:

دەستەی راگەیاندن و پەیوەندییەکانی عێراق رایگەیاند، بەهەماهەنگی لەگەڵ دەزگای ئاسایشی نیشتیمانی عێراق بارەگای سەرەکی کۆمپانیای کۆڕەک تیلیکۆم و چەند بنکەیەکی فرۆشتنی لەشاری بەغدا داخران و رێکارەکانیش لەدژی ئەو کۆمپانیایە بەردەوامن.

دەستەی راگەیاندن و پەیوەندییەکانی عێراق لەڕاگەیەنراوێکدا ئاماژەی بەوەکرد،" ئەو هەنگاوە لەچوارچێوەی جێبەجێکردنی بڕیار و رێکارەکانی دژ بە کۆمپانیای کۆڕەک تیلیکۆم نراون و خۆیان لەداخستنی بارەگای سەرەکی لەگەڕەکی جادرییە و سێ ناوەندی فرۆشتنی کۆمپانیاکە لە گەڕەکەکانی عەرەسات، شەقامی فەڵەستین و مەنسوڕ دەبینێتەوە ".

دەستەی راگەیاندن و پەیوەندییەکان دوپاتیکردەوە کە رێکارەکانیان بۆ جێبەجێکردنی بڕیارەکان بەپێی یاسا بەردەوام دەبن، ئەوەش لەپێناو پاراستنی  مافی دەوڵەت و بەرژەوەندی گشتی و پاراستنی مافی بەکارهێنەرانی خزمەتگوزارییەکانی پەیوەندیکردن.