شارپرێس:

راپۆرتە هەواڵگریی و سەربازییەکان ئاشکرای دەکەن کە توانای بەرگریی کۆماری کوبا بە شێوەیەکی بەرچاو پاشەکشەی کردووە، بە جۆرێک سوپای وڵاتەکە کە لە سەردەمی شەڕی سارددا یەکێک بوو لە هێزە دیارەکانی جیهانی سێیەم، ئێستا گۆڕدراوە بۆ تەنیا سێبەرێک لە ڕابردووی خۆی.

پاش هەرەسی یەکێتیی سۆڤیەت، ژمارەی سەربازانی کوبا لە 200,000 کەسەوە بۆ نێوان 40 بۆ 45 هەزار سەرباز کەم بۆتەوە، هاوکات فڕۆکە جەنگییەکانی میگ و کەشتییە دەریاییەکانی بەهۆی نەبوونی چاکسازییەوە لەکارکەوتوون.

 شارەزایانی بەرگریی پێیان وایە هێزە چەکدارەکانی ئەم دوورگەیە لە ئێستادا چانسی ڕووبەڕووبوونەوەی ڕاستەوخۆیان لە دژی سوپای ئەمریکا نییە.

لە لایەکی دیکەوە، واشنتۆن هەڵمەتێکی گوشاری توندی دژ بە حکومەتی هاڤانا دەستپێکردووە و کەشتیی فڕۆکەهەڵگری ڕەوانەی دەریای کاریبی کردووە.

دۆناڵد ترەمپ، سەرۆکی ئەمریکا، کوبای وەک هەڕەشەیەکی نائاسایی بۆ سەر ئاسایشی نەتەوەیی وڵاتەکەی ڕاگەیاندووە و تۆمەتباری کردووە بە هاوکاریی ڕێکخراوە تاوانکارییەکان و میوانداریکردنی بنکە سیخوڕییەکانی چین و ڕوسیا.

 هەروەها ئەمریکا لێکۆڵینەوە و تۆمەتی کوشتنی ئاڕاستەی ڕاوۆل کاسترۆی تەمەن 94 ساڵ، سەرکردەی مێژوویی شۆڕشی کوبا کردووە. لە پاڵ ئەمەشدا، دزەپێکردنی ڕاپۆرتێکی هەواڵگریی لەسەر کڕینی 300 فڕۆکەی بێفڕۆکەوان لەلایەن کوباوە بۆ هێرشکردنە سەر بنکەی گوانتانامۆ یان ویلایەتی فلۆریدا، لەلایەن چاودێرانەوە وەک پاساوێک بۆ ئەگەری هێرشی سەربازیی ئەمریکا لەقەڵەم دەدرێت.

لە بەرامبەر ئەم هەڕەشانەدا، میگێل دیاز کانێل، سەرۆکی کوبا، هۆشداریی توندی داوە کە هەر دەستێوەردانێکی سەربازیی دەبێتە هۆی دروستبوونی گۆمی خوێن.

 حکومەتی کوبا لە ئێستادا مەشقە سەربازییەکانی بۆ خەڵکی سڤیل چڕکردۆتەوە لە چوارچێوەی ستراتیژیەتی "شەڕی هەموو گەلان" کە مێژووەکەی بۆ ساڵی 1980 دەگەڕێتەوە، تێیدا هاووڵاتیانی بەتەمەن و ژنان ڕاهێنانیان پێدەکرێت بۆ بەکارهێنانی چەکی کۆن و چاندنی مین.

ئەم ئامادەکارییانە لە کاتێکدایە کە وڵاتەکە بەدەست قەیرانێکی خنکێنەری ئابووری، گەمارۆی نەوتیی ئەمریکا، و بڕانی بەردەوامی کارەباوە دەناڵێنێت، کە کاریگەری نەرێنی توندی لەسەر ورە و توانای مەشقی سوپاکە دروستکردووە.

 شارەزایانی سەربازیش دووپاتی دەکەنەوە کە کوبا تەنیا دەتوانێت پشت بە شەڕی گەریلایی درێژخایەن ببەستێت بۆ پاراستنی مانەوەی خۆی لە ئەگەری هەر داگیرکارییەکدا.
ئاکۆ عەبدوڵڵا ئاڵی