شارپرێس:
وەزارەتی دەرەوەی تورکیا، ڕۆژی هەینی ١٦ی تشرینی یەکەمی ٢٠٢٦، پێشوازی لە دیاریکردنی محەممەد سەمعان ئاغا ئۆغڵو، پارێزگاری کەرکووک، کرد وەک وەزیری ڕاوێژکاری کاروباری کەمینەکان؛ کە وەک هەنگاوێک بە ئاراستەی بەهێزکردنی جێگیریی سیاسی هەڵدەسەنگێنرێت.

ستایشی وەزارەتی دەرەوەی تورکیا بۆ دیاریکردنی محەممەد سەمعان ئاغا وەک وەزیری ڕاوێژکاری، لەو ڕووەوە گرنگە کە ڕەنگە نیشانەی بەردەوامیی پرۆسەی زیادبوونی بەشداریی تورکمانە نزیکەکانی تورکیا لە پێکهاتەی دەسەڵاتی عێراقدا بێت.

ئەم پرۆسەیە لە سەردەمی حکومەتی محەممەد شیاع سوودانییەوە دەستی پێ کرد، کاتێک وەزارەتی بەرگری درایە پابت عەباسی، سیاسەتمەداری تورکمان؛ دواتریش تورکمانەکان لە پۆستی پارێزگاری کەرکووکدا بەشدار بوون.

ئێستاش، تەرخانکردنی پۆستێکی وەزاری بۆ تورکمانەکان، دەتوانرێت وەک هەنگاوێکی تر بۆ جێگیرکردنی پێگەی سیاسیی ئەم گرووپە لە پێکهاتەی حکومەتی عێراقدا هەڵسەنگێنرێت.

لەو ڕوانگەیەوە، کاردانەوە ئەرێنییەکەی ئەنقەرە دەتوانرێت لە چوارچێوەی گرنگیی بەشداریی ئەو هێزە تورکمانانەدا لێکبدرێتەوە کە نزیکن لە تورکیا و لە دامەزراوە جێبەجێکارییەکانی عێراقدا ئامادەیییان هەیە؛ هەروەها لە چوارچێوەی هەوڵەکانی تورکیا بۆ فراوانکردنی نفووزی خۆی لە ڕێگەی ئەم لایەنانەوە.