شارپرێس
لەسەر ڕێگری لە ڕووماڵكردنی خۆپیشاندانی خوێندكارانی بەشەناوخۆی زانكۆی پۆلەتەكنیكی هەولێر لەیەن بەرپرسانی بەشە ناوخۆییەكەوە، لیژنەی پاڵپشتی رۆژنامەنوسان وێڕای ئیدانەكردنی ئەو ڕێگرییانە لە ڕۆژنامەنوسان، داوا لەلایەنە فەرمیەكان دەكات، ملكەچی دەستور و یاسا و رێسا و پەیماننامە نێودەوڵەتیەكان ببن.

لە ڕاپۆرتێكدا، لیژنەی پاڵپشتی رۆژنامەنوسان بڵاویكردەوە، ئەمڕۆ، بەڕێوەبەری كاروباری بەشی ناوخۆیی زانكۆی پۆلەتەكنیكی هەولێر رێگری لەژمارەیەكی زۆری رۆژنامەنوسان كرد روماڵی خۆپیشاندانێكی خوێندكاران بكەن و دەستدرێژیشی كردە سەر پەیامنێرێكی ڕۆژنامەوانی و بەتوندی لێیدا و ئامێرەكانی تێكشكاند.

ڕۆژنامەنوس نەبەز رەشاد لەوبارەیەوە بە لیژنەی پاڵپشی رۆژنامەنوسانی لە عێراق ڕاگەیاند، لەگەڵ پەیامنێرانی ئاژانسەكانی شارپرێس و كۆباس و وڵات و كەناڵی nrt ، هەژار ئەنوەر و تیمان رەواندوزی و ئەیوب ساڵح و محەمەد خەلیل شوانی و چۆمان محەمەد، لەكاتی روماڵكردنی خۆپیشاندانێك كە قوتابیانی بەشی ناوخۆیی زانكۆكە رێكیان خستبوو وەكو ناڕەزایەتی دەربڕینێك بۆ خراپی خزمەتگوزاریەكان و نەبونی ئاو و كارەبا، بەڕێوەبەری بەشەكە دەستدرێژی كردە سەر نەبەز رەشاد و لێیدا و رێگەی پێنەدا روماڵی خۆپیشاندانەكە بكات.

بەوتەی ئەو ڕۆژنامەنوسە، بەڕێوەبەرەكە قسەی نەشیاو و سوكایەتی بە پەیامنێر و كامێرەمانەكان كردوە و ئامێری هەندێكیشیانی تێكشكاندوە و داوای لێكردون هەر بەپەلە شوێنی خۆپیشاندانەكە بەجێبهێڵن و وێنەگرتن رابگرن.

لیژنەی پاڵپشتی رۆژنامەنوسان ئیدانەی ئەو دەستدرێژیە دەكات كە كراوەتە سەر رۆژنامەنوسان لە هەولێر و داوا لەلایەنە فەرمیە بەرپرسەكانی هەرێمی كوردستان دەكات، رۆژنامەنوسە عێراقیەكان پارێزراوبن لەكاتی روماڵكردنی روداوەكان و ملكەچی دەستور و یاسا و رێسا و پەیماننامە نێودەوڵەتیەكان ببن.

لیژنەكە داوا لە كۆمەڵە یاساییە پەیوەندیدارەكان و رێكخراوە نێودەوڵەتیەكان و نەتەوەیەكگرتوەكان دەكات بەدواداچون بۆ ئەو حاڵەتانە بكەن كە روبەڕوی رۆژنامەنوسان دەبێتەوە.
س.س